Каспий теңізінде із-түзсіз жоғалған екі әскери қызметшінің денесі табылды. Осылайша іздестіру-құтқару операциясы аяқталды, деп хабарлады Қорғаныс министрлігі.
25 қыркүйекте сағат 09:15 шамасында іздеу жұмыстары кезінде сержант Мансұр Гумаров пен матрос Мирас Тұрдыбекұлының денесі табылған.
Осылайша Каспийдегі қайғылы оқиғадан қаза тапқан әскери қызметшілер саны 14-ке жетті. Үш әскери қызметші аман қалды.
Қорғаныс министрлігінің мәліметінше, 24 қыркүйекте оқу-жауынгерлік міндетті орындау кезінде ауа райы кенеттен күрт нашарлап, 17 әскери қызметшіні ашық теңізге алып кеткен. Олардың үшеуі құтқарылды.
