Қазақстанда мәслихат депутаттарының санын анықтаудың жаңа тәртібі бекітілді. Орталық сайлау комиссиясының қаулысына сәйкес, енді мандат саны өңірдегі халық санына қарай есептеледі.
Жаңа ереже бойынша:
· облыстық мәслихаттарда – өңірде 300 мыңға дейін тұрғын болса – кемінде 26 депутат. Әр қосымша 200 мың тұрғынға 2 мандат қосылады;
· Астана және республикалық маңызы бар қалаларда 1,1 млн тұрғынға дейін – кемінде 30 депутат. Әр қосымша 200 мың тұрғынға тағы 2 мандат беріледі;
· қалалық мәслихаттарда – шаһарда 50 мың тұрғынға дейін болса - кемінде 11 депутат. Әр қосымша 25 мың адамға 1 мандат қосылады;
· аудандық мәслихаттарда 15 мың тұрғынға дейін болса – кемінде 10 депутат. Әр қосымша 15 мың тұрғынға 1 мандаттан беріледі.
Құжатта бірқатар қалалардағы депутаттар саны да нақтыланды. Ақтөбеде – 30, Таразда – 28, Семейде – 22, Алатауда – 11 депутат болады.
Ал аудандық мәслихаттар арасында Алматы облысындағы Қарасай, Еңбекшіқазақ және Іле аудандарына ең көп – 25 мандаттан қарастырылған.
Депутаттар саны сайлау тағайындалған күнгі Ұлттық статистика бюросының халық саны туралы ресми деректері негізінде анықталады.
