Қазақстандық кино сүйер қауым асыға күткен басты интригалардың бірі шешімін тапты. Қазақстанның Оскар комитеті 2027 жылы өтетін беделді Америка академиясының «Оскар» сыйлығына ел атынан қатысатын басты үміткерді ресми түрде атады. Бұл мәртебелі жолдамаға режиссер Елзат Ескендірдің Кеңес Одағы ыдырағаннан кейінгі алмағайып заманды суреттейтін «Әбіл» драмасы лайық деп танылды. Төрт бірдей беделді кәсіби ұйымның басын қосқан комитет мүшелері өзге жанрдағы туындылардан гөрі осы картинаның көркемдік қуаты мен халықаралық аренадағы мойындалуын жоғары қойған.
Туындының орталығында 1993 жылғы ауыр кезеңде жекешелендіру мен әділдік іздеп сандалған қарапайым шопан Әбілдің тағдыры өрбиді. Жылдар бойы атқарған адал еңбегінің өтеуін ала алмай, жаңа жүйемен бетпе-бет келген кейіпкердің күресі бүгінгі көрерменді де бей-жай қалдырмасы анық. Комитет төрағасы Данияр Саламаттың айтуынша, бұл фильм өз елінің ғана емес, әлемдік көрерменнің жүрегіне жол таба білген нағыз шынайы өнер туындысы. Сонымен қатар кинотанушы Дана Әмірбек пен басқа да сарапшылар басты рөлді сомдаған Ерлан Төлеутайдың еш артық эмоциясыз, аса табиғи шыққан ойыны мен польшалық оператор Йоланта Дылевсканың байыпты визуалды шешімін жоғары бағалады.
Айта кетейік, «Әбіл» отандық прокатқа шықпай тұрып-ақ әлемдік додаларда топ жарған болатын. Атап айтқанда, Пусан халықаралық кинофестиваліндегі сәтті тұсаукесерден кейін, Франциядағы Vesoul фестивалінде бірден үш мәртебелі марапатты (Grand Jury Award, Critics’ Jury Prize, NETPAC Jury Prize) қанжығасына байлады. Сондай-ақ басты рөлді сомдаушы Бішкек мен Жібек жолы халықаралық кинобайқауларында «Үздік ер адам рөлі» номинациясын жеңіп алды. Мәдениет және ақпарат министрлігі мен Ұлттық киноны қолдау орталығының қолдауымен «Қазақфильм» базасында түсірілген бұл картина енді «Үздік халықаралық толықметражды фильм» санатында ел намысын қорғайды. Ал бәйгенің келесі кезеңдеріне қатысты түпкілікті шешімді Американдық академия өз регламентіне сай қабылдайтын болады.
