Еңбек және халықты әлеуметтік қорғау министрлігінің мәліметінше, соңғы уақытта азаматтарды шетелге жұмысқа шақыратын күмәнді хабарландырулар көбейген. Мұндай ұсыныстар әсіресе әлеуметтік желілер мен мессенджерлер арқылы белсенді таратылады.
Кейбір хабарландыруларда жұмыс берушілер жоғары жалақы, тегін жол жүру, баспана және жеңіл жұмыс жағдайын уәде етеді. Алайда ведомство мұндай ұсыныстардың артында Қазақстанда ресми тіркелмеген делдалдар немесе алаяқтықпен айналысатын тұлғалар тұруы мүмкін екенін ескертеді.
Министрлік мәліметінше, күмәнді жарнамаларға сеніп, алдын ала ақша аударған немесе шетелге барғаннан кейін қиын жағдайға тап болған азаматтар бар. Мұндай жағдайда зардап шеккен адамның құқығын қорғау күрделене түседі. Себебі жұмыс беруші ресми тіркелмеген болуы, еңбек шарты жасалмауы немесе ұсынылған жұмыс шарттары бастапқы уәдеге сәйкес келмеуі ықтимал.
Шетелдегі жұмыс ұсынысын қалай тексеруге болады?
Мамандар шетелде жұмыс істеуге шешім қабылдамас бұрын жұмыс беруші мен делдал компания туралы ақпаратты мұқият тексеруге кеңес береді. Ең алдымен еңбек шартының талаптарымен танысып, жұмыс орны, жалақы мөлшері, тұратын жері және жұмыс уақыты құжатта нақты көрсетілгеніне көз жеткізу қажет.
Сондай-ақ азаматтардан жұмысқа орналастыру, виза рәсімдеу немесе басқа қызметтер үшін алдын ала ірі көлемде ақша сұралса, ұсынысқа күмәнмен қараған жөн.
Еңбек министрлігі қазақстандықтарды жұмыс туралы ақпаратты ресми дереккөздерден тексеруге, белгісіз адамдарға жеке құжаттары мен банк деректерін бермеуге және күмәнді ұсыныстар бойынша ақша аудармауға шақырды.
Ведомство өкілдері шетелге жұмысқа орналасуды жоспарлаған азаматтарға тек заңды түрде жұмыс істейтін ұйымдардың қызметін пайдалануға және келісімшартсыз жұмысқа келіспеуге кеңес береді.
